موضوع مهم جداااا انصح كل ام انها تقرأه ضروري

موضوع مهم جداااا انصح كل ام انها تقرأه

ضروري

تشعر البنات ان عقد الزواج ماهو الا عقد توظيف لخدمة الزوج و اولاده 

فمن اول يوم فهى تقوم بكل مهام التنظيف و التنظيم و الطبيخ و الغسيل و الكوى و...و....و....
دا غير الرضاعة و الاكل ورعاية الرضيع 
ثم المذاكرة و التوصيل والتدريب والتعويد و التمريض و مهام لا تنتهى 

و هذا شىء رائع
و قد تشعر بالسعادة و هى تؤدى هذا الدور فى شبابها و هى بصحتها و تشعر بالانجاز

و تحس بالفرحة لما تلاقى بيتها مرتب و نظيف
تحس بالفرحة لما تطبخ طبخة حلوة ياكلها الاولاد و جوزها و هم مبسوطين
تحس بالفرحة لما تلاقى درجات اولادها المدرسية و انجازاتهم الرياضية ممتازة

و مع مرور الزمن

و مع استقرار الزوج فى عمله و بأة عنده وقت فراغ معتبر المفروض يساعدها فيه

و مع كبر الابناء و بأة عندهم القدرة انهم يساعدوها

و مع تقدمها فى السن و احساسها ان قدراتها النفسية و الجسمانية معدتش تستحمل الشقا و التعب الى كانت بتتعبه زمان بنفس راضية

بتبدأ تحس بالألم الشديد
و الرغبة فى الهروب و الخروج من ايامها الروتينية القاتلة و مهامها التى لا تتوقف طول ما هى فى البيت
بتحس ان عمرها ضاع فى التنظيف و الغسيل و ياريت حد حاسس بيها و بتعبها

بتحس بالألم انها لا تجد اى تقدير من زوجها و لا حتى من اولادها ...
حتى بيضنوا عليها بالكلمة الطيبة
و طول النهار طلبات و انتقادات لاعمالها الى معدتش بالاتقان بتاع زمان

بتحس بالألم انها وقفت معاهم و خدمتهم السنين دى كلها و يوم ماتحتاج مساعدة ماتلاقيهاش

و بيوجع أوى اوى يوم ما تقع و تحتاج المساعدة بجد
يوم ما تتعرض لأزمة صحية
يوم ما تتعرض لأزمة نفسية بموت اخ او احد الوالدين
ولا تجد اى تعاطف معاها
سواء من جوزها الى اتعود على ان كل حاجة بتتعمل مظبوطة و فى معادها
و الا حتى من اولادها لما يكبروا و يبقوا قادرين على المساعدة و لا حد بيعبرها

احساس قاتل بضياع العمر على ناس مايستاهلوش

حبيبتى :

مع كل احترامى لما فعلتيه من اجلهم
بس انت الى خلتيهم كدة
انت الى خلتيهم يتعاملوا معاك كخادمة

انا بشوف امهات مش بتعد مع اولادها على السفرة ساعة الاكل و تفضل واقفة زى الخادم للى عايز ماية و الى عايز معلقة تانية و الى عايز عصير و الى مش عاجبه الاكل تعمل اكل تانى
و تعد فى الاخر تاكل البواقى

بشوف اولاد بيكلموا امهاتهم بمنتهى الصفاقة و قلة الادب
انت ازاى ماطبيختيش كذا
و ازاى ما تخيطيش البنطلون المقطوع
و ازاى ما تكويش القميص
و ازاى ما تمسحيش الجزمة
و ازاى سايبة المكتب كدة مش مترتب

بشوف أمهات اولادها بيرموا هدومهم فى كل مكان فى الاود و الحمامات و هى ماشية تلم وراهم
سيبيهم كدة هدومهم مرمية لحد ما يلاقوش هدوم يلبسوها

بشوف امهات لازم تصحى ولادها الكبار للمدارس و الجامعة و بتجيب الشاى و الفطار لابنها على السرير و لو يوم نامت و ماصحيتش من التعب يبقى يومها اسود

بشوف رجالة بيؤمروا زوجاتهم بالطلبات بمنتهى الجليطة و التجهم
فين الشاى
فين الحاجة الحلوة
فين العصير
فين العشا
عايزها علطول تكون واقفة على راسه لتنفيذ طلبات سى السيد
و ساعات بعد ماتجيب كمان يقول لها ايه القرف دا

للاسف حضرتك الى سكتى على كدة و هم اتعودوا عليه خلاص
و يوم ما هتحتاجى مساعدتهم و الا حتى تعاطفهم النفسى و الرحمة بيكى بس و لا هتلاقى

لانهم اتعودوا على الخادمة الى بتخدم بدون ما تطلب و لا تعترض و لا حتى تتأفف و لا تقول آه او بتقول و بتعمل برده

من أول سنة جواز علمى جوزك انه يطلب بشكل مهذب و انه يشكر لما الحاجة تتعمل

دربيه على ان فيه ايام ممكن تكونى تعبانة فيها او حتى مش جايلك نفس بس ما تسوقيش فيها
يعنى يوم فى الاسبوع كويس
زى ماهو عنده يوم اجازة من شغله
من حقك تاخدى يوم اجازة من شغل البيت

انا شخصيا عاملة لنفسى يوم اجازة اسبوعى بناكل فيه برة و اروح اتخدم فى المطعم

او بنجيب دليفرى و محدش يطلب منى حاجة ابدا ..دا يوم اجازتى
اى حاجة تتأجل

عودى اولادك من صغرهم على الشغل دا
انت بتخدميهم مؤقتا لحد ما يقدروا يعملوا
و القدرة مش انهم يعرفوا يعملوا لان طول ماهم مش بيتدربوا مش هيعرفوا

انا اقصد القدرة الجسمانية
اى حد فيهم يقدر جسمانيا يعمل حاجة لنفسه يعملها
فيها ايه لما تعوديهم يجمعوا هدومهم و يحطوها فى الغسالة
فيها ايه لما ينشروا و يطووا الغسيل معاك
فيها ايه لما تعلميهم يجهزوا اكلهم بنفسهم
الى مش عاجبة الاكل ياكل عيش و جبنة او يحضر لنفسه وجبة تانية
الى مش عاجبه الغسيل يغسل لنفسه
الى مش عاجبه الكوى يكوى لنفسه
لا تسمحى ابدا بانتقادهم لاعمالك الى انتى بتعمليها حبا ليهم و هم بياخدوها على انها حق مكتسب

فيها ايه لما تعوديهم يذاكروا لوحدهم
فيها ايه لما تعوديهم يركبوا مواصلات و يروحوا و ييجوا بنفسهم
فيها ايه لما تعوديهم يجيبوا طلبات البيت

هتفضلى تدلعى فيهم لحد ما ييجى اليوم الى رافضين انك تكبرى و تتعبى
و تلاقيهم مش عاجبهم و بيتأمروا وعايزين كل حاجتهم جاهزة

حبيبتى

حبى نفسك و احترميها علشان تقدرى تفرضى احترامك على جوزك و اولادك

عوديهم من صغرهم على المساعدة علشان تظبطى انانيتهم و يطلعوا عندهم احساس بالاخرين

خليهم يحسوا بالمسئولية عن البيت زيك بالظبط
علشان يقدر البيت يقوم فى غيابك و يقدروا يشيلوا بيوتهم بعد كدة

و يبقى من حقك انك تتعبى او حتى تكسلى دا حقك تماما
اطلبى منهم المساعدة صراحة لو محتاجاها
و لو ماعملوش يبقى الحاجة مش هتتعمل
انا تعبانة و مش جايلى نفس

اوعى تديهم الفرصة انهم يعاملوك على انك خادمة و لا تسمحى ابدا ابدا بكدة
فانت بتصرفاتك و احترامك لنفسك من يبنى صورتك فى ذهنهم
ارحمى نفسك قبل ما تطلبى الرحمة